DIE  12 MONATE


auf sächsisch


 

Januar


Da haud’s doch gladd de Miedz vom Boom,

jedz gomm de erschdn Floggn!

Die daumeln runner wie im Droom -

da bleibd kee Ooche droggn!


 

Februar

 

De Ginner holn heid ihre Schliddn ausn Geller raus.

De alde Melbern ausm Driddn guggd schon zun Fensdor naus.

Dasse nur nischd vorbassn duhd - neigierdsch wie Schmidts Ziech’!

Na - wer had’n greeßdn Mud? Fliesch, mei Schneeball, fliesch!


 

März

 

Kevien, Svennie, Schaggelien

duhn fleißisch Schneemann baun.

Nur Oba Rischard nuschld vor sisch hin -

„Es-dudd-schonn-widdor-daun...“


 

April

 

Dor Abrill, de budzsche Nudel, veräbbld uns mid Wonne -
bisde biddsch-nass wie ä Buhdl, illord hell de Sonne!

Uns Saggsn hads noch nie geschdärd, denn mir sinn rundrum friedlisch,
hamm ä Gemiede wie ä Bfärd - nu ähmd so rischdsch gemiedlisch!


Mai

 

Ei gugge da, de scheen’ Bliemln fang’ nu an ze bliehn!

De Narzissn unn de Brimln - alles wärd jedz grien.

De Dulbn unn dor lila Flieder verschdröhm ihrn sießn Dufd.

Mor hörd de scheensdn Liebeslieder - ‘s lieschd was in dor Lufd!


 

Juni

 

Sommer, Sonne, Himmel blau...
dor Saggse machd sisch off de Soggn
unn drängld sisch mid nei in’ Stau,
weil de Weld dud loggn.

 

 


Juli

 
Nu gnalld de Glara voll vom Himmel, mor siehd de Leide schwidzn.
In Schrebergärdn is Gewimmel, de Wasserschleische schbridzn.

Dor Babba midn Rasenmähor lunsd zu Nachbars Teenie
unn hoffd, se gommd mah bissel nähor - se had so’n scheen Bigini!

 

 

August

 

Weißderhole, im August isses enne Demmse!
Sogar dor Biebmadz häld de Gusch, schdeschn dud de Bremse.

Bubslau is de Brieh im Deisch, braggdsch ne zu gebrauchn -
wenns ne balde giehler wärd, gannsde gaum noch grauchn!

 

September

 

Dor Sebbdämbor ernded gern
‘s Obsd unn oochs Gemiese.
Mache hin, sonsd falln de Bern’
unn Äbbln off de Wiese!

 

 

Oktober

 

Ei verbibbsch, de Sonne sinkt,
dor Herbsd is in dor Nähe!
De Bläddor fallen nu vom Boom,
im Agger sitzt de Grähe.

 

 

November

 

‘S Schahr is bald alle,
dor Frost gommd ins Land,
de Leide sinn mufflisch,
‘s is ieborall Schmand.

 

 

Dor Dezember

 

Silvesdor schdidd nu vor dor Dier, ‘s wärd widdor ä Gegnalle!
Dor Erisch brülld noch schnell: „Ä Bier! Eh’s alde Schahr is alle!“

De Draudl dud schon widdor moofn: „Lass doch das Bier, Mensch Meier -
isch war in Rährschdorf Seggd eigoofn, dord warer grad ne deier!“